ما كتبت الأسبوع اللي فات، لأسباب شخصيـه رهيييبه 😎
أول وأهم تحديث، قبل أقول الأشياء اللي تعلمتها.
بتاريخ 28/يناير/2025، شريت  سيــــــــــاره  🚗😍!!!
مُغرم فيها بشكل مهب طبيعي كل شوي أخترع مشوار عشان أتمشى فيها. أول شخص ركبها أكيد عبداللطيف 😎.
ماعلينا، خنبتكلم عن شيء تعلمته هالأسبوع، بما اني كنت مشغول مرررره ماقدرت أتكلم عنه قبل أسبوع فما قفلت الصفحة يوم تعلمته عشان أرجع له.

الإدارة الدلالية لنُسخ البرمجيات 2.0.0

الأرقام اللي بعد كل تحديث في التطبيقات، كنت أحسبها رقم وبس. طلع فيه أسباب للترقيم.
اسمها أرقام دلالية للنسخ البرمجيه. بمعنى: vX.Y.Z

X: ترقيم جذري MAJOR. تغيير كبير في تطوير البرنامج
Y: ترقيم بسيط MINOR. تغيير بسيط لإضافة مزايا للبرنامج وماراح تأثر بالبرنامج بشكل كبير
Z: ترقيم ترقيع PATCH. يكون بس للإصلاحات وسد الثغرات. ماراح يكون تعديل لأي وظيفة بالبرنامج

أفلام شفتها هذا الأسبوع

Blade Runner (1982):  فلم قديم بدون أجنده. بس ممل اللعنــــــه حسيت اني أتابع فلم ثلاث أيام متواصله من كثر الطفش (2.5/5)
Blade Runner 2049 (2017):  أحداث الفلم بعد ثلاثين سنه من الفلم الأول. فرق كبييير يشدّك ويحمّسك. تقريبًا فهمت 70% من الميمز بالانترنت لأنها من هذا الفلم (3/5)

أهداف الأسبوع الجاي

نظام إدارة المحتوى:  أبغى أرجع أنتبه للنظام اللي أنشغلت عنه الأسبوع الجاي.
ألتزم بنظام نومي الحالي:  هذي الفتره صرت أنام قبل الساعة تسع، وأصحى قبل صلاة الفجر وأبدا يومي. أبغى ألتزم بهالنظام لأطول مدة ممكنة.
لمبات ذكية:  أبغى أطلب لمبات ذكية وأركبها في غرفتي، لأن صار لي شهرين أأجل هذا الموضوع بس أبغى أسويها الأسبوع الجاي.

وبس الحين ما أقدر أفكر زيادة. بحاول أكتب الأسبوع الجاي.
شكرًا.