هـلا..

تدوينتين من أول يوم، آسف متحمس.
آخر مره سافرت، كانت مع صديقي راكان. مين راكان؟

تعرفت عليه من تويتر، في 2017 يمكن؟ ما أدري ما أعرف أضبط التواريخ.
ماقابلته من 2017 الى 2019 الا مره وحده أو مرتين بالكثير.
علاقتنا قبل 2023 كانت سطحيه جدًا، بس نتكلم من سنه لسنه

في 2023، صرنا نتكلم كثير أنا وراكان بالأيام ونطلع كل ويكند مع بعض. طلعاتنا طويله من العصر الى الفجر تقريبًا، عشان كذا دايم نطلع بالويكند.
أتصل علي راكان مره في 2023 في أكتوبر، ومع السوالف، قال وش رايك نروح أربع أيام لقطر؟ قلت ليش لأ؟ وحجزنا في نص نوفمبر عشان أقدر آخذ اجازه وهو نفس الكلام.
قعدنا في قطر أربع أيام، ثلاث أيام في الدوحة ويوم في جزيرة موزة. كانت سفرة ممتعة شوي وتمشينا كثير وأكلنا أكثر وتهاوشنا شويّ بس.
بعدها، بدأ يدور في رأسي سالفة “Solo Traveling”… أبغى أسافر لحالي وأستكشف أماكن بدون أي جدول محدد، بدون شروط وقيود من أي أحد معي. بدون محد يصحيني بدري وينومني بدري.
وين أول مكان فكرت فيه؟ فكرت في السويد، كنت أحبها لأني شفت “النرويج” في مسلسل “Lilyhammer”، شفته أيام الدبلوم بشكل عشوائي بدون اي اقتراح من أحد.
أجوائها شتوية دايمًا “بالنسبة لشخص عايش في الرياض”. مسالمين، حبيبين.
بعدها، جا في بالي “جنوب أفريقيا”. لأن ايش؟ احتمال اجازتي توافق الصيف، شهر أغسطس، قمة الحرّ بالسعودية. وهناك يبدأ الشتاء والثلوج في جنوب أفريقيا! وأساسًا دولة حلوه “حسب اللي شفته في يوتيوب”.
ما حجزت شيء، لا للسويد ولا جنوب أفريقيا. قلت بنتظر لين أرفع اجازتي وأبدا أحجز بنفس الوقت.
شهر أغسطس فجأه، صار عندي ثلاث كورسات متتاليه. تاخذ مني حدود الشهر كامل. فما قدرت أرفع اجازه لأني ما أشتغلت في المكتب (حسب كلام مديري).
شهر سبتمبر، جلست مع مديري، قلت بآخذ اجازة في سبتمبر، وافق عليها، مدة أسبوع ويومين فقط لا غير (مع اليوم الوطني).
وين رحت؟ بدون تخطيط، “Langkawi”. حجزت منتجع مدة أسبوع كامل. كانت الخطة أن الفتره كاملة تكون “إستجمام”. أقعد في البلكونة وأناظر السماء فقط لا غير. لأني تعبت هذي السنة ومرّيت بالكثييييييييييييييييييييير.
وهذا اللي حصل. طلعت يمكن ثلاث أو أربع مرات. رحت مكان أشبه بحديقة حيوان و أكواريوم بس ما أدري ايش هو بالضبط. اسمه عالم تحت الماء. أخذت فيه لفتين. وأشتريت منه مروحة و شنطتين (هدايا). فقط لا غير.

هل أعجبتني التجربة؟ نعم
هل بأكررها؟ نعم

الخطة السنة الجاية تكون سفرة إلى “أمستردام”. سواءًا أسبوع أو يوم واحد فقط. ما أدري. أبغى أسافر لحالي. ما شبعت. أدمنت.