هلا ..
قاعد أكتب الساعة ست ونص بدال ما أقوم أتروش و أتجهز لدوامي عشان ما أنسى الأشياء اللي كنت بكتبها.
الساعة 2 فجرًا تقريبًا. كلمني صديق (خلينا نسميه عبداللطيف). وينك؟ أنا فالشقة (في النسيم)، وش تسوي؟ ولا شيء. طيب أرسل لوكيشن أنا بجيك (من النرجس للنسيم)… أوكي؟!
جاني. ركبت معه. ما قد قابلته في حياتي كلها. أعرفه تقريبًا من 2018.
أنقطعنا عن بعض تقريبًا 2021 يمكن؟ ما أتذكر. بس أنقطعنا قطعه حبيّه بدون مانتزاعل ولا شيء. كل واحد أنشغل بحياته. مامن مشاريه.
إلى الساعة 6:00 صباحًا وحنا نسولف. نتكلم. نفكر. نحلّل. نهوجس.
الخطة كانت “شاهي، وفرّة بالسيارة”. أتفقنا على الخطة بس هل ألتزمنا فيها؟ لأ. لأنها محطوطة عشان نصمل فقط لا غير.
بحط النقاط الأساسية اللي تكلمنا عنها.
وش تغيّر بحياتك؟ #
سولفنا عن كل شيء تغير بحياتنا. وش صار من 2021 إلى 2024/11/24.
وش صار على فلان. وفلان. وفلان وفلان وفلان. كيف حياة فلان وفلان وفلان؟
كل هذي حطيناها فالبداية بدون تخطيط عشان نوصل لأنفسنا بالأخير. بنهاية الطلعة.
أختلفنا أنا و(عبداللطيف) أنه مافيه شيء يدوم.
عبداللطيف يقول:

أعتبر حياتك قطار. الأشخاص اللي بحياتك كل واحد عنده كرسي. وكل واحد بيركب معك في محطة وينزل في محطة أخرى هو يبغاها.
لو فيه شخص بحياتك كان يملك ثلاث مقاعد في هذا القطار، ومشى. فيه ثلاث أشخاص راح يقعدون بنفس الثلاث مقاعد. أو شخص واحد.
الشخص هذا اللي يملك ثلاث مقاعد كان كل يوم تتابع معه فلم، تداومون بنفس المكان، تسافرون مع بعض. بيجون ثلاث أشخاص لكل شخص منهم مهمة واحدة من هالثلاث مهمات. شخص للسفر شخص للعمل شخص للأفلام.

أنا أقول:

هل لو تزوجت راح أقول ببالي أو لزوجتي (شريكة حياتي) ماراح ندوم لبعض وبيجي بنص الطريق شيء يفصلنا وكل واحد يصير بحياة مختلفة عن الثاني؟ هل راح أعيش بهذا القلق وأنه كل شخص راح يروح ومحد يقعد للأبد بحياتك؟ يمكن فيه أشخاص يقعدون دايمًا.

أتفقنا نختلف. يمكن. أنا عن نفسي أقتنعت أني بختلف مع رأي عبداللطيف لين يجي اليوم اللي أثبت فيه العكس.
وش مفهومك للثقة؟ #
سؤال كلنا ما حصلنا له إجابة. للأمانة. عبداللطيف يسألني أنت وش المعايير اللي تعطي فيها الشخص الثقة؟ جوابي كان:

ما أعطي أحد ثقة. ولا أسلبها من أحد. أنا برأيي أن كل الناس جديرين بالثقة دام الأقدار مكتوبه، ومثل ما قال راشد الفارس “هي الأقدار مكتوبة. فللأقدار ما شاءت”.

عبداللطيف يقول:

لما ناقشت أكثر من شخص. يقولون أنا قبل أعطي أحد الثقة أعطيه إختبار. بس ايش؟ لو عطيته اختبار بكون وثقت فيه وعطيته الإختبار.

ما حصلنا إجابة كلنا. هوجاسة طارفة قلناها وتركناها.
تلفيل الحياة؟!؟! #
عبداللطيف، كان مثلي يومًا ما. ماهو مرتاح بحياته. ماهو مرتاح بدوامه. وللأمانة كان اسوأ ببعض الحالات مثل أنه ما عنده سيارة فكان يستأجر كثير.
عبداللطيف اليوم يشتغل فريلانسر. ومع أحد “أكبر” الشركات في العالم -ماشاء الله تبارك الله-. يحب شغله. يحب حياته. يحب سيارته “مازدا الرومي”. يشتغل بشغف وعيونه فيها قلوب 😍!
حكم أستفدت من عبداللطيف فيها: #

التوقعات.

عبداللطيف يقول. ليش كل شاهي بالرياض هو أحلى شاهي بحياتي؟ لأني ببسااااااطة ما أتوقع من الشاهي شيء. أتوقعه سيء ويجيني شاهي عادي. أعتبره أفضل من توقعاتي.
حكمة عبداللطيف لنا “أصدقاء المدونة، في حال أنتشرت لاحقًا” لا تتوقع الزين أبدًا. لا من أشخاص ولا من شاهي بالرياض. #

التغييرات.

حياة عبداللطيف بالفترة من 2018 إلى مايو/2024 كانت إلى حدٍ ما. ثابته.
قبل ست شهور. قرر عبداللطيف يحط حد لحياته. قرر يغير كل شيء. أي شخص بحياتي يسيء لي أكنسله. أي شخص بحياتي ينكّد علي أكنسله. أي شخص يحسسني بشعور سيء أكنسله.
أنا مسؤولية نفسي. وأنا مسؤول عن نفسي فقط مو عن غيري.
حكمة عبداللطيف لنا. لا تتوقع أن فيه أحد بيحترم حدودك بدون ما تحترمها أنت #

التقدير

صديق مشترك بيني وبين عبداللطيف. صديق مفقود. الله يردّه بالسلامة. قال حكمة لعبداللطيف وعبداللطيف من يومها يطبقها.
رحت تعبي بنزين؟ اسأل العامل عن اسمه. ايش اسمك؟ شاكر. شكرًا يا شاكر أنك عبيت لي بنزين.
رحت تشرب قهوة؟ اسأل الباريستا عن اسمه. ايش اسمك؟ محمد. شكرًا يا محمد على القهوة.
الشخص اللي يشتغل طول يومه مع زباين. يبغى أقل شيء تعرف أسمه. لو جيته مره ثانيه وناديته بأسمه تكون أهديته هدية ما كان يتوقعها بحياته.
اسأل الشخص عن اسمه دايمًا. بيّن لهم التقدير. #
فيه حكم أكثر بكثير قالها عبداللطيف. بس يمكن أذكرها بتدوينات ثانية. بأستغلّه بشكل مب طبيعي.
عبداللطيف كلمني عن سفرته لمدريد، اللي كانت مفاجئة، بدون خطط، وكيف قدر يعطي شخص غريب أعظم سر بحياته ويسمع منه أعظم سر بحياته.

سفرة مدريد. #
عبداللطيف كان يعاني بشده، قبل ست شهور، كانت حياته مُتعِبه بعض الشيء. قرر الساعه 12 الظهر أنه بيسافر لمدريد، بدون ما أحد يدري، بدون ما يحجز سكن، بدون ما يخطط لشيء.
فتح جواله، حجز تذكرة ذهاب وعودة الرياض-جدة-مدريد <–> مدريد - جدة - الرياض.
راح للسنيدي، أشترا شنطة رحلات. رجع شقته. حط فيها “أساسيات البقاء” فرشة أسنان. سماعة، لبسين فقط. وشاحن جوّال.
الرحلة كانت الساعة 4 الفجر. الساعة 1 جاه ألم بضرسة. حصّل مستوصف يفتح 24 ساعة. قال للدكتور أنا مستعجل جدًا. أبغى أحل المشكلة لأن رحلتي بعد ثلاث ساعات فقط. والدكتور يهندس تأخر الوقت إلى أن أنتهى. طلب أوبر وسيارته عند العيادة. أوبر تأخر بتقفل البوابة. قال الدكتور أنا بأوصلك للمطار؟! يلا بينا إلحئ العربية دي.
وصل المطار. وصل لجدة. وصل لمدريد. حط رجله في مدريد. حس بالـ(ولا شيء). ما حس بالشعور اللي يدوّره اللي يتوقع أنه بيرتاح بعد ما يوصل لمدريد وينحاش من المشاكل. حجز سكن من Airbnb (موب إعلان) أول يومين من السفرة اللي مدتها ست أيام كانت تأمل السقف. تأمل المطل (قصر قدام الشباك). بدون أكل. نوم وتأمل.
اليوم الثالث. كلّم صديقه. عطني أشياء أسويها في مدريد. أبغى أسوي شيء.
صديقة قال رح (منطقة نسيت أسمها بالقصة). فيه هناك أماكن حلوة. فيه مطاعم حلوة. فيه تمشية حلوه.
كانت الرحلة من مدريد إلى هذيك المنطقة نص ساعة بالقطار. راح عبداللطيف من الصبح. أنشقت السماء مطر. ما معه مظلة. قرر أنه يدوّر مظلة ما حصّل. هوّن عن المظلة وقرّر يسوي هايكنق على جبل بنهايته كنيسة (والعياذ بالله).
وصل فوق. وصلته أفكاره اللي تركها في الرياض. حسم الأمر بقرار التغيير هناك. قرّب الغروب ف قرر عبداللطيف أنه ينزل من الجبل رغم المصاعب والوحل بالطريق. وصل للقطار. تأجلت الرحلة نص ساعة. وسماعة عبداللطيف طفت والجوال شغل الموسيقى اللي كان يسمعها عبداللطيف على سبيكرز الجوال. فيه شخص اسباني قال ممكن ما تطفيها نبي نسمع؟ وكل الناس ساكتين وبس يسمعون عزف عود كان يسمعه عبداللطيف لحاله. وكل ما تخلص الموسيقى تشتغل اللي بعدها من يوتيوب (موب إعلان).
عبداللطيف قرّر أنه يمشي ويتعرّف على غرباء. بدون أي وسيلة تواصل. يمشي ويتعرّف. بدون ما يكون فيه أي رابط بينهم. الهدف من العلاقات بس أنك تتكلم عشر دقايق وتخلص اللي ببالك هذيك اللحظة وتمشي. وبعدها راح تحصل شخص ثاني وقت ما تجيك أفكار ثانية.
عبداللطيف في الرجعة إلى جدة. كانت الطيارة فاضيه لأنه مب موسم سفر.
كان فيه عائلة سعودية راجعه من مدريد. وعائلة باكستانية جايه تاخذ عمره. وشخص وحيد بالطيارة. ما جنبه أحد.
قرّر عبداللطيف أنه يقعد جنب هذا الشخص. يتعرّف عليه معرفة عابرة فقط لا أكثر. جلس جنبه. تكلّموا مدة ساعتين. جت المضيفة وأكتشف عبداللطيف أنها تعرف هذا الشخص الغريب. قال كيف تعرف مضيفة طيران بشكل عشوائي جدًا. كم شخص حولك يعرف مضيف طيران في رحلة من مدريد إلى جدة؟ احتمال كبير أنه صفر من بين سلسلة معارفك.
طلع الشخص المجهول شغلته “مضيف طيران”. عنده إجازة من العمل فقرر يدخل معهد في مدريد. والحين إجازة في المعهد فقرر يرجع لأهله في جدة.
بعد ما عرفنا وظيفة الشخص المجهول. الحين المفروض نعرف أسمه. وش أسمك؟ أنا اسمي سلطان وأنت؟ “عبداللطيف”.
يا سلطان، أنا وأنت ما بيننا أي وسيلة تواصل. قل لي أعظم سر بحياتك. وأنا بعطيك أعظم سر بحياتي.
وقالوا الأسرار لبعض.  كان ودي اسأل عبداللطيف عن الأسرار بس اسمها أسرار لسبب. ياليتني ما تربيت زين
يا سلطان، لو جيت جدة وين أحصلك؟ لأن ما بيننا أي وسيلة تواصل. راح تحصلني في المكان الفلاني أشرب شاهي.
وأنت يا عبداللطيف. وين أحصلك لو جيت الرياض؟ تحصلني في الرياض في المكان الفلاني ألعب بورد قيمز أو أمشي بالحي الفلاني.
وخلاص. وصلوا جدة. نزل سلطان. وكمل عبداللطيف طريقة إلى الرياض مع عقلية مختلفة جدًاااااااااااااا. قرارات عظيمة. مسؤوليات مختلفة.
الحين، المفروض أنا أقوم أتجهز لدوامي لأن الساعة سبع وربع. وأنا صار لي أكتب أكثر من 45 دقيقة. #
قصص عبداللطيف جدًا عظيمة. أحتاج أطلع معه أكثر من مليون مره. وأسجل معه أغلب الطلعات وحنا نتكلم. مثل ما قلت لعبداللطيف أنه بآخذ منك اقتباسات كثيره وبكتب عنك في مدونتي السريّة جدًا.
يوم السبت بإذن الله. راح أطلع مع عبداللطيف نسمع نكت ناس ونقيّمها. نشوف من أكثر شخص يضحك في الرياض يوم السبت القادم.
شكرًا عبداللطيف. سعيد جدًاا بهذي الفرّة الفجريه.
❤️