من زمان ما كتبت شيء. أحس راسي مليان ومحيوس.
أبي أكتب أهداف للسنه، بس مب بالطريقة المعتادة. أبي أكتب لكل شهر لستة أهداف أحس كذا بيكون أسهل علي.
بس الحين قرّب يخلص يناير. فما أدري وش حققت ولا وش أبغى أحقق من أهداف فيه.
بس عمومًا، 2025 هي سنتي من الحين أقولها. أكثر سنه أقدر أقول أنها سنتي.
ليش؟ صارت طلعاتي كثير. تقريبًا ودعت الكسل. صارت عندي أهداف أسبوعيه كل ثلاثاء وخميس “أرتب شقتي وأغسل ملابسي”.
تعرفت على ناس كثير. جربت أروح أماكن جديده رهيبه مره. طلعاتي مع “عبداللطيف” صارت أرهب بمليون مره من قبل. حتى لو ما عندنا شيء بس عندنا وقت فراغ نطلع نتمشى أو نسكت.
مبدئيًا كذا أنا حبيت هالسنه من بدايتها. مع أنه ماكان فيه أي شيء مميز صار في رأس السنه غير اني أخذت اجازة يوم 31/ديسمبر/2024.
صوّرت مع سعيد العويران في 31/ديسمبر/2024. ورحت سينما مع عبداللطيف ومحمـد ودخلنا فلم مب فلمنا وقومنا ناس من كراسيهم نحسبها كراسينا. ونامو عبداللطيف ومحمد وانا كملت الفلم لحالي.
يوم 3 يناير، قابلت صديقي عزوز اللي من جـدة. أعرفه من عشر سنوات لكن ولا مره قابلته. طلعنا الظهر ورجعت لحالي المغرب. بعدين رحت مكان رهيب اسمه lvlup. مجتمع جـــامد.
يوم 4 يناير رحت ستاندب كوميدي، تعرفت على “حصــة” كوميدين وخفيفة دم ووسيعة صدر وتقدر تشوف النكتـه بكل شيء مهما كان. وحسيت اني أقدر أصير كوميدين بس ناقصني أكتب سوالف تكمل أكثر من دقيقه لأن كل النكت اللي أقولها تخلص بثلاث ثواني.
يوم 6 يناير قابلت صديقي سلمان، جاء من القصيم عشان يتوظف في الرياض. طلعت معه بعد الدوام كم ساعه بعدين رجعت نمــت.
يوم 9 يناير تابعت فلم هـوبـال -من الآخر. أحسن فلم سعودي-.
يوم 10 يناير، رحت بيت خالتي من سنيــــــــن ما شفتهم. أنبسطت معهم من العصـر للمغرب عاد ومشيت. جرّبت “هوتشوكلت المهندسين”. صـراحـة. عــــــــــــادي مرّه.
يوم 12 يناير، جرّبت هوتشوكلت بالبرتقـــــــال. من أكسير البن. حموضه وحلاوه جايه بشكل حلوّ صـراحه. ورحنا الـدرعيـة مكان رهيـب outdoor أسمه كوزفن، كلّـه فنون وفنـانين. وتمشّينا كثيــر بتوالي الليل وتعشينا كبـــاب.
يوم 14 ينايــر، شريـت جــــوال. عتقت جوالي الحمـدلله. ورحت أجــرب هوتشوكلت جديد من NeverEnoug. أقـدر أقول عنه شغل بيت صـراحه لأن مافيه تكلّف. بس مخبوزاتهم حلوه.
أحب أمتنّ لرفقاء رحلة 2025. والجـــاي أحـلى بمليون مرّة. ماراح تنتهي هذي السنـة بدون إنجـازات. خصوصًا أني ناوي آخذ شهادتين هذي السنـة. ECBA & CCBA.
شكـــرًا.