هــلا..
أحس أن الحياة صايره تبتسم لي، بشكل حلو! لأول مره يعني أحس الدنيا ما وراها بلا.
بالعادة، تقريبًا كل الناس. لو حس أن الدنيا تبتسم له يشيل هم المصيبة اللي بيطيح فيها مستقبلًا. إلّأ أنا. و إلّا هالمرّه.
حياتي صايره مليانه من بعد آخر مره طلعت مع “عبداللطيف”.
صرت أشوف جوانب من الحياة كنت أخاف منها وأبعد عنها، أختلط بالناس أكثر، أطلع أكثر من المعتاد حتى لو لحالي.
صرت أقدّر الحياة أكثر وأنبسط بأقل شيء أقدر أشوفه.
أحس أني أعيش بنعمة عظيمة جدًاااا، حتى لو شفت مناديل أقعد أحمد ربي على نعمة اني قدرت أوفّر هذا الشيء البسيط.
قدرت أغيّر شقتي بنفسي وقادر أعيش لحالي وقادر أسوي أشياء كثير بنفسي. الحمدلله على هالنعمه العظيمة.

غيّرت شقتي -الحمدلله-، جهّزت الشقة الجديدة تقريبًا ما بقى الا أني أجيب من شقتي القديمة باقي الأشياء.
يوم الجمعة. طلعت أنا و “عبداللطيف” و طارق. طارق ما أعرفه أبدًا.
جرّبنا المترو. بس تعطّل علينا 😁. كملنا الطريق مع أوبر.
كانت خطتنا من الأساس أننا نجرّب المترو بهالطلعه لأنه أهم نقطه متفقين عليها.
رحنا لـ “أسبوع مسك للفنون”، أول مره أروح مكان زي كذا.
مكان كبير كلّه فنانين، أنواع أول مره أشوفها من الفنون، أشياء أول مره أدري أنها تصنّف كـ فن.
أعجبني معرض “عين فهد” كان قاعة فيها صور للرياض قديمًا، مب قديمًا قديمًا. يعني بفترتي، فترة التسعينات والألفين. حسيت بإنتماء عجييييييب!
دخلت معرض “فيصل بن فهد”، كان ديجتل آرتس رهيبه. شيء يجذبني صراحه.
بعد المعرض. رجعنا مع طارق. طارق شخص رهييييييييييب.
أول مره أقابل طارق وحسيت أني أعرفه من سنييين. سوالفه رهيبه وممتع بشكل مب منطقي تحسه قلتش.
يمكن أول شخص بحياتي أول يوم أقابله وأقوله let’s socializa وأضفته في انستقرام.
أول مره أقول “طز بالرهاب. طز بالقلق. بخالط ناس جديده وأصادقهم بالغصب”. وبصراحه اللي يجي من “عبداللطيف” أكيد بيكون شخص ممتاز.
كان يوم ممتع. يوم إحتمال كبيير ما ينّسي. وصداقات لعلها ان شاء الله تدوم 😁.